Rritja e pagës minimale, sa kontribute do të paguajmë më shumë?

Rritja e pagës minimale, nga 34 mijë lekë që është aktualisht në 40 mijë lekë nga 1 prilli, do të shoqërohet me rritje të nivelit të kontributeve, që duhet të paguajnë punëdhënësit dhe punëmarrësit. Po sa do të paguajë më shumë një i punësuar me pagë minimale duke filluar nga muaji i ardhshëm?

Kemi bërë një përllogaritje. Për pagën minimale 34 mijë lekë që është aktualisht, paguhen në total sigurime shoqërore dhe shëndetësore, si për pjesën e punëdhënësit ashtu edhe punëmarrësit një shumë prej 9.486 lekë. Ndërsa me pagën minimale 40 mijë lekë, duke filluar nga 1 prilli, pagesat e kontributeve arrijnë në 11.160 lekë në total. Pra, rritja e pagës minimale do të shoqërohet me rritje të nivelit të kontributeve prej 1674 lekësh më shumë.

Kjo padyshim është një ndihmë, ndonëse jo e konsiderueshme për skemën e pensioneve, e cila vuan aktualisht nga një deficit i theksuar.