Frenohet në shkurt treguesi i besimit në ekonomi

Sinjalet e paqarta që po vijnë nga tregu kanë bërë që qytetarët dhe bizneset të frenojnë optimizmin tek ekonomia. Banka e Shqipërisë ka publikuar Treguesin e Ndjesisë Ekonomike, që për muajin shkurt qëndroi i pandryshuar, duke u frenuar pas tre muajve radhazi në rritje.

Sektorët që kanë shënuar një rritje të besimit, sipas këtij vrojtimi, janë ndërtimi, tregtia, prodhimi dhe të besimi konsumator. Ndërkohë sektori i shërbimeve shënoi rënie të besimit, duke bërë që të japë efekt të kundërt dhe ky tregues të qëndrojë i pandryshuar. Banka e Shqipërise vlerëson se pavarësisht stanjacionit në shkurt, Treguesi i Ndjesisë Ekonomike vijon të qëndrojë mbi mesataren historike.

Ky tregues është i rëndësishëm, pasi dëshmon për perceptimin që kanë bizneset dhe konsumatorët mbi gjendjen e ekonomisë dhe prirjet e tyre për të investuar dhe konsumuar.