Rreth 49 mijë fermerë kanë përfituar nga skema kombëtare e subvencioneve për vitin 2022, kundrejt një fondi të përgjithshëm prej 5.1 miliardë lekë. Fondet kanë shkuar si mbështetje që nga shpërndarja e naftës pa taksa, subvencione direkte për fermerët që kultivojnë në sera, grurë, bimë medicinale, blegtoria, peshkimi dhe bletaria.
Sipas të dhënave zyrtare të Ministrisë së Bujqësisë, 43 për qind e fondit ka shkuar për mbështetjen e fermerëve me naftë falas për punime të mekanizuara në bujqësi, ku numri total i përfitueseve arriti në 34.731 fermerë.
Ndërkohë edhe pse mbështetja për blegtorinë ka qenë ndër më të kritikuarat, për shkak të situatës së keqe në të cilin ndodhet ky sektor, shifrat tregojnë se 33 për qind e fondit ka shkuar për blegtorët, më një numër total prej 5981 përfituesish. Më pas renditet kultivimi i grurit, fushatë e cila edhe pse u ndërmor në muajin Tetor, mori 11 për qind të fondeve, ku u shpallën fitues 4200 fermerë.
Ndërkohë, për bletarinë kanë shkuar 7 për qind e fondeve, për farat dhe fidanët kanë shkuar 4 për dhe në fund renditet sektori i bimëve medicinale, për të cilin janë akorduar vetëm 2 për qind e totalit të financimit në bujqësi.
Rritja e fondeve të vëna në dispozicion për subvencione në bujqësi është pasuar me interes të shtuar nga ana e fermerëve, të cilët kusht kryesor për përfitim, kanë pasur formalizmin e tyre. Referuar statistikave zyrtare të Drejtorisë së Përgjithshme të Tatimeve, përgjatë vitit 2022 janë pajisur me nipt 21.397 fermerë, duke e çuar në total numrin e fermerëve aktiv apo të formalizuar në 84.383.
Skema kombëtare në ndihmë të fermerëve shqiptarë nëpërmjet subvencioneve direkte hynë në fuqi në muajin shkurt të vitit të kaluar. Miratimi i tyre erdhi pas shfuqizimeve që qeveria u bëri skemave ekzistuese për sektorin e bujqësisë dhe blegtorisë, siç ishte ajo e subvencionimit 6% të TVSH-së dhe vendosja e TVSh-së te inputet bujqësore që prej 2018-s kishin TVSH zero.
