Turizmi është një ndër sektorët kryesorë të ekonomisë shqiptare, me një kontribut prej 10.6% në Prodhimin e Brendshëm Bruto dhe me rreth 384 mijë të punësuar direkt dhe indirekt. Është një ndër sektoret kryesorë, nëpërmjet të cilit Shqipëria është integruar në ekonominë globale dhe që promovon vendin në botë. Gjatë 10 viteve të fundit, rritja vjetore e turistëve të huaj që kanë hyrë në vend është shumë më lart se mesatarja europjane prej 5 %. Por pavarësisht zhvillimit të këtij sektori vitet e fundit, sfidat mbeten të mëdha. Kjo edhe në kuadër të konkurrencës së vjen nga vendet e tjera, që gjithashtu e kanë turizmin një sektor prioritar.
Ajo që konsiderohet e ardhmja është zhvillimi i një turizmi të qëndrueshëm, që nënkupton zbatimin e standardeve ndërkombëtare në cdo hallkë të tregut, sic po aplikohet edhe në vendet e tjera. Për turizmin e qëndrueshëm dhe benefitet që sjell, u diskutua në konferencën “Shqipëria: Rruga jonë drejt turizmit të qëndrueshëm”, me praninë e ekspertëve vendas dhe të huaj. Një konferencë e organizuar RisiAlbania, një projekt i Agjencisë Zvicerane për Zhvillim dhe Bashkëpunim SDC në bashkëpunim me Ministrinë e Turizmit dhe sektorin privat
Gjatë konferencës, në panelet e ndryshme të diskutimit u dha mesazhi se turizmi i qëndrueshëm është gjithëpërfshirës, zgjat sezonalitetin, rrit cilësinë e shërbimit për konsumatorët, mbron mjedisin, zhvillon sektorët e tjerë të lidhur me turizmin, si agroturizmi etj.
Përvojat ndërkombëtare tregojnë se turizmi i qëndrueshëm është e ardhmja e turizmit dhe shumë vende dhe biznese po përshtaten me standardet dhe kriteret e qëndrueshme.
