“Kemi humbur kontaktet” Familja ngre alarmin për të shumëkërkuarin Ervis Martinaj

Një nga personat më të kërkuar të policisë shqiptare është Ervis Martinaj.

Ndërkohë mësohet se familjarët kanë humbur kontaktet me të, duke bërë një kallëzim në polici.

Ka qenë xhaxhai i 40 vjeçarit, Faik Martinaj, i cili është paraqitur në komisariat.

Burimet thonë se i moshuari pretendon se nuk ka asnjë kontakt me nipin e tij.

Martinaj është në kërkim pasi sipas dëshmisë së të penduarit të drejtësisë Nuredin Dumani kishte urdhëruar vrasjen e Endrit Dokles, atentat që nuk u realizua.

Kallëzimi vjen pak kohë pas masakrës së ndodhur te mbikalimi i Fushës Krujës ku u ekzekutua kushëriri i tij Brilant Martinaj, Dikler Vata dhe Besmir Hoxha.

Policia ka dështuar në disa aksione për arrestimin e Ervis Martinaj. Ndërkohë që në lidhje me pretendimin e familjes nuk dihet nëse është një inskenim nga ana e të shumëkërkuarit apo mund të jetë përpara një tjetër ngjarje të rëndë kriminale.