Rama e shkarkoi për djegien e KZAZ, policia merr në pyetje Zef Hilën

Ditën e sotme Policia e Shkodrës ka thirrur kryetarin e Bashkisë së Vaut të Dejës Zef Hila, për të dhënë një deklaratë për ngjarjet e fundit në KZAZ, nr.6.

Mësohet se ai është paraqitur në ambientet e komisariatit rreth orës 12:00, për t ë dhënë dëshminë e tij dhe më pas është larguar.

Në polici, Hila është shprehur se nuk ka pasur dijeni për çfarë do të ndodhte në KZAZ-në e Vaut të Dejës. “Dija vetëm që do të bëhet protestë paqësore. Nuk kam dijeni për asgjë tjetër”, ka thënë Hila.

Ndër të tjera bëhet me dije se Zef Hila nuk është nën hetim dhe nuk ka asnjë ndalim apo procedim ndaj tij.

Një informacion të tillë e ka konfirmuar edhe organi i procedurës.

Kujtojmë se kreu i qeverisë Rama ka firmosur shkarkimin nga detyra të Zef Hilës, ndërsa thirrja gjatë ditës së sotme është bërë për t’u pyetur mbi incidentin e rëndë që ndodhi në KZAZ e kësaj bashkie, e vendosur në shkollën “Ndreu Mjeda”, në Bushat.