Ish-kryeministri japonez, Shinzo Abe, është qëlluar me armë gjatë një aktiviteti zgjedhor në prefekturën Nara në Japoninë qendrore. Mediat e huaja shkruajnë se Abe u rrëzua përtokë teksa mbante një fjalim dhe u transportua menjëherë në spital.
Sipas mediave lokale, ish-kryeministri japonez “nuk tregon shenja vitale. Ndërkohë autori i dyshuar i sulmit ndaj ish-zyrtarit është një 42-vjeçar, Tetsuya Yamagami, me origjinë nga zona ku ndodhi sulmi. Personi është arrestuar me akuzën e tentativës për vrasje.
Sulmuesi, i armatosur me një pushkë gjysmë automatike, me sa duket prodhim artizanal, do të kishte plagosur edhe persona të tjerë. Qeveria japoneze konfirmoi se “një burrë, që besohet të jetë autori, është marrë në paraburgim” dhe shtoi se gjendja e Abe “aktualisht nuk dihet”.
Nga ana tjetër, 67-vjeçari ishte i angazhuar në një tubim dhe u rrethua nga qindra njerëz kur autori qëlloi të paktën dy të shtëna me pushkë pas tij dhe nga afër, duke e goditur ish-kryeministrin në shpinë dhe ndoshta në qafë.
