Arrestohet vëllai i kryebashkiakut të Vaut të Dejës, Alfred Hila, i shpallur në kërkim nga policia si një ndër autorët e djegjes së materialeve zgjedhore në KZAZ-në e kësaj zone.
Lajmi bëhet i ditur nga Policia e Shkodrës. Kjo e fundit njofton se bashkë me arrestimin e 51 vjeçarit ka shkuar në 15 numri i të arrestuarëve për sulmin ndaj KZAZ dhe punonjësve të policisë.
“Kapja dhe ndalimi I tij u bë pasi më datë 27.06.2019, rreth orës 20:00, së bashku me shtetas të tjerë kanë sulmuar KZAZ duke përdorur sende të forta dhe bomba molotov në drejtim të KZAZ, si dhe në drejtim të punonjësve të policisë, ku për pasojë janë djegur materialet zgjedhore, si dhe janë dëmtuar tre punonjës policie të Komisariatit të Policisë Vau Dejës të planifikuar në shërbim pranë kësaj KZAZ-je”, deklaron Policia e Shkodres.
Ndërkaq ky institucion njofton se vijon puna për kapjen e personave të tjerë të shpallur në kërkim dhe vënien e tyre para përgjegjësisë ligjore.
Materialet procedurale në ngarkim të autorëve të sulmit me bomba molotov dhe djegies së materialeve zgjedhore, i kaluan Prokurorisë pranë Gjykatës së Shkallës së Parë Shkodër, për veprat penale të ‘’Shkatërrimi i pronës me zjarr’’, ’’Kundërshtimi me dhunë i punonjësve të policisë të rendit publik’’ dhe ‘’Dëmtimi i materialeve zgjedhore”, parashikuar nga nenet 151/2, 236/2 dhe 326/a të Kodit Penal.
