Nga 1 korriku, pa Roaming në rajon. Ja sa do të jenë tarifat

Nga data 1 Korrik hyn në fuqi marrëveshja e Roaming mes vendeve të rajon. Përdoruesit e celularëve do të komunikojnë nga këto shtete me të njëjtat tarifa që përdoren brenda secilit prej këtyre vendeve.
Marrëveshja u nënshkrua më 4 Prill në Beograd, teksa fillimisht operatorët e telekomunikacionit do të kenë të drejtë të aplikojnë shtesa mbi këto tarifa. Sipas të dhënave të AKEP, tre operatorët celularë që operojnë në tregun vendas kanë dorëzuar tarifat që do të zbatojnë duke nisur nga dita e hënë.
Qytetarët shqiptarë pritet të jenë ndër përfituesit më të mëdhenj nga kjo marrëveshje, për shkak të përdorimit më të lartë të roaming krahasuar me shtetasit e rajonit që vijnë në Shqipëri, por edhe për shkak të kostove të larta që tashmë kursejnë.

Sipas AKEP, kompanitë shqiptare paguan rreth 550 mijë euro për roaming ndaj operatorëve rajonalë, ndërsa çmimi që paguajnë përdoruesit shqiptarë është edhe më e lartë.
Në bazë të marrëveshjes, tarifat roaming me pakicë nuk duhet të jenë më të larta se 0.19 euro/minutë, 0.06 euro/SMS dhe 0.18 euro/MB. Kjo përkthehet në një kursim deri në 10 herë të qytetarëve shqiptarë.

Por si e përdorin roaming qytetarët shqiptarë?

Sipas të dhënave të Autoritetit të Komunikimeve Elektronike dhe Postare, Kosova është vendi nga ku shqiptarët shpenzojnë më shumë minuta, rreth 1 milionë njësi të shpenzuar për vitin 2017. Pas Kosovës, shqiptarët flasin më tepër nga Mali i Zi dhe Maqedonia me përkatësisht 816 mijë dhe 689 mijë minuta.

Ndërsa thirrjet janë më pak të përdorura në Serbi dhe Bosnje Hercegovinë.
Përsa i takon përdorimit të internetit, shqiptarët kanë shpenzuar mbi 4 mijë gibabyte në Mal të Zi, më shumë se në çdo vend tjetër të rajonit. Pas saj ndjek Kosova dhe Maqedonia. Shqiptarët duket se preferojnë internetin për të komunikuar jashtë vendit, një nga shërbimet që do të ketë zbritjen më të madhe në kosto duke nisur nga 1 Korriku.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern