Përfundon mbledhja e kryesisë së PS, zbardhen porositë e Ramës pa praninë e kamerave

Vetëm pak momente më parë ka përfunduar mbledhja e kryesisë së Partisë Socialiste.

Në fokusin e diskutimeve ka qenë java e fundit e fushatës dhe zgjedhjet e 30 qershorit, që sipas Ramës nuk mund të negociohen dhe së është koha kur populli ka të drejtë të marrë fjalën.

Kryeministri Edi Rama ka dhënë porosi për mbarëvajtjen e procesit zgjedhor dhe se ka kërkuar të dokumentohet çdo incident i mundshëm në ditën e zgjedhjeve.

“Të dokumentohet çdo incident i mundshëm gjatë ditës së zgjedhjeve. Të garantohet mbarëvajtja e procesit zgjedhor. Të jemi korrekt me procesin e administrimit zgjedhor. Të respektohet kodi zgjedhor. Kush prek votën dhe manipulon votën, do përgjigjet para ligjit. Më 30 qershor të kemi një proces me standarde”, është shprehur Rama pa praninë e kamerave.

Ditën e premte do të zhvillohet mitingu përmbyllës i fushatës elektorale në qytetin e Vlorës ndërsa kujtojmë se ditën e sotme Kolegji Zgjedhor do të vendosë nëse dekreti i Metës për anulimin e zgjedhjeve do të jetë i vlefshëm apo ato do të zhvillohen më 30 qershor siç kërkohet nga mazhoranca.