Përseritja e zgjedhjeve në Turqi, Erdogan humb për herë të dytë

Partia turke që është në pushtet, Partia për Drejtësi dhe Zhvillim, ka zyrtarizuar humbjen për zgjedhjet lokale të përsëritura në Stamboll.

Kandidati i partisë kryesore në opozitë, Ekrem Imamoglu ka fituar 54 % të totalit të votave, teksa janë numëruar pothuajse të gjitha votat.

Edhe në zgjedhjet lokale herën e parë që u mbajtën në mars ai ishte shpallur fitues, mirëpo Partia për Drejtësi dhe Zhvillim e presidentit Recep Tayyip Erdogan kishte anuluar zgjedhjet pasi u ankua për parregullsi në proces.

Kundërshtari i tij nga partia në pushtet, Binali Yildirim ka pranuar humbjen.

Presidenti Recep Tayyip Erdogan ka përgëzuar fituesin e zgjedhjeve.

“E uroj Ekrem Imamoglun, që ka fituar zgjedhjet, bazuar në rezultatet paraprake”, ka shkruar ai në Twitter.

Në fjalimin e tij të fitores, Imamoglu tha se rezultatet e zgjedhjeve shënojnë “një fillim të ri” si për qytetin e Stambollit, po ashtu edhe për shtetin.

“Po hapim një faqe të re në Stamboll. Në këtë faqe, do të ketë drejtësi, barazi dhe dashuri”, u shpreh ai.

Ai shtoi se është i gatshëm të punojë me presidentin Erdogan, duke thënë “zoti president, jam i gatshëm të punoj në harmoni me ju”.

Sipas rezultateve, Imamoglu udhëheq me mbi 775 mijë vota, që shënon një ngritje të madhe krahasuar me rezultatin e zgjedhjeve të mbajtura në muajin mars, ku ai kishte fituar me një diferencë prej 13 mijë votash.

Imamoglu është nga partia sekulare, Partia Republikane dhe ka qenë kryetar i qarkut Beylikduzu të Stambollit.

Kundërkandidati i tij është Binali Yildirim ka qenë kryeministër i Turqisë prej vitit 2016 deri më 2018 dhe ka shërbyer edhe si ministër i Transportit dhe kryetar i Parlamentit truk.

Zgjedhjet e sotme lokale janë parë si test për presidentin Erdogan dhe partinë e tij.