1000 euro, 1000 dollarë dhe rreth 400.000 lekë (të reja) kanë grabitur një ditë më parë autorët e armatosur në një bankë në Koplik. Mësohet se shumat e parave janë grabitur nga sportelet e bankës.
Kanë qenë 3 persona që kanë hyrë të maskuar për të grabitur paratë e filialit të bankës. Ata kanë hyrë në bankë rreth orës 14:10 minuta. Në ambientet e bankës përveç punonjësve ka pasur dhe klientë, që janë terrorizuar. Nën kërcënimin e armëve grabitësit morën paratë dhe u larguan me një mjet “Volkswagen” ngjyrë të errët.
Pak minuta më vonë në dalje të qytetit, rrugës për në Bajzës i vunë zjarrin makinës në mes të rrugës. Më pas ndaluan një makinë tip Benz në të cilin ndodheshin tre persona. I kërcënuan me armë dhe më pas i zbritën nga mjeti. Grabitësit morën Benzin dhe u larguan në drejtim të Hanit të Hotit.
Efektivët e policisë si dhe ato të FNSH-së së Shkodrës janë vënë në ndjekje të tyre dhe ende nuk i kanë kapur.
Po ashtu, me ndihmën e një helikopteri u bënë edhe kontrolle nga ajri.
