Presidenti Meta i është kundërpërgjigjur sërish Mazhorancës, në kohën kur kjo e fundit ka nisur procedurat e shkarkimit të tij.
Kreu i shtetit, Ilir Meta i ka dërguar një letër Kuvendit, konkretisht kryetarit të komisionit të Ligjeve, Ulsi Manja ku i thekson se dekreti për anulimin e zgjedhjeve është nxjerrë sipas Kushtetutës.
Lidhur me nismën e ndërmarrë për shkarkimin e tij, Meta thotë se e gjithë veprimtaria aktuale parlamentare që përpiqet të godasë veprimtarinë e presidentit, duke e quajtur atë një proces të rremë, të pambështetur në argumente kushtetues, por vetëm të orientuar verbërisht e politikisht.
“Ky dekret është në fuqi dhe është botuar në Fletoren Zyrtare nr.84, ditë e martë 11 qershor 2019, e për pasojë është i njohur dhe i detyrueshëm për zbatimin nga të gjithë, përfshirë edhe Kuvendin e Shqpërisë. Dekreti është një akt i rëndësishëm me natyrë kushtetuese i marrë në respekt edhe të detyrimeve të Republikës që burojnë nga aderimi i saj në aktet ndërkombëtare dhe angazhimi në procesin e integrimit në BE. Konkretisht ky akt i rëndësishëm i Kreut të Shtetit, i cili ndërpreu një proces zgjedhor fiktiv, të transformuar praktikisht në një proces votimi, pa garë dhe pa alternativa, respekton posaçërisht nenin 3 të Protokollit nr.1 të Konventës Europiane të të Drejtave të Njeriut, si dhe detyrimet që Shqipëria ka marrë përsipër me nënshkrimin e marrëveshjes së Stabilizim Asociiimit Shqipëri-BE, me hyrjen në fuqi më 29 gusht 2006”, shkruan Meta në letrën drejtuar Manjës.
