Gjykata e Shkodrës ka dhënë paraditen e kësaj të shtune masën e sigurisë “arrest shtëpie” për ish-deputetin e Partisë Demokratike, Bardh Spahia. Ky i fundit u arrestua pas protestave për lirimin e ambienteve të KZAZ në Shkodër, ku iu vu flaka materialeve zgjedhore dhe një klase ku ato ishin vendosur.
Sakaq për protestuesit e tjerë, gjykata vendosi t’i lërë në burg për 30 ditë. Të dy efektivët të policisë bashkiake të Shkodrës Afred Nikolli dhe Gentian Bytyçi morën këtë masë, ndërsa të ndaluarit e tjerë Adi Garuci e Aleks Ndoj kanë marrë masën e sigurt “arrest shtëpie”, si dhe “detyrim paraqitjeje” për Orlando Thepin.
Seanca u zhvillua me dyer të mbyllura dhe mësohet se ish-deputeti ka qëndruar më shumë se 48 orë në izolim, pasi u ndalua nga policia teksa shkonte të merrte pjesë në një debat televiziv. Në mbështetje të Spahisë ishin dhe disa ish-deputetë të PD-së, mes të cilëve, Salianji dhe Noka.
