Kriza energjetike, Karakaci: Nuk do të ketë ndërprerje të energjisë

Enea Karakaci, drejtor i përgjithshëm i energjisë në Ministrinë e Energjetikës, i ftuar në “A2 Business” me Aurora Sulçen, në A2 CNN, garantoi se qeveria i ka marrë të gjitha masat që në vend të mos mungojë energjia elektrike, pavarësisht krizës energjetike globale.

“Është një krizë globale energjetike, që vjen nga taksat, ulja e prodhimit të energjisë nga era dhe kërkesa shumë e lartë për gaz natyror. Kjo çoi në krizë energjetike. Në Shqipëri, kemi pasur edhe pak reshje këtë vit. Situata është e vështirë, por nuk jemi fare në situatë paniku, tha Karakaci.

Kur u pyet edhe sa ditë punë ka Fierza, Karakaci tha: “Niveli i Fierzës rritet e ulet në vite të caktuara. Në këto nivele, ku duket Kukësi i vjetër, ka qenë disa herë në histori. Nuk është folur për katastrofë. Po marrim të gjitha masat, për të ulur konsumin dhe ai do të vijë të ulet, pasi po hyjmë në muajt e ngrohtë. Që sot ka nisur ulja e konsumit, pasi është ngrohur koha. Nuk jemi aspak në prag kolapsi”.

Karakaci shtoi se qeveria ka marrë të gjitha masat që të mos ketë ndërprerje të energjisë elektrike: “Është e padiskutueshme që nuk do të ketë. Nuk po flasim në situata apokaliptike, nëse lufta përshkallëzohet. Por, në situatën e çmimeve të larta dhe me pak reshje, kemi marrë të gjitha masat që të mos ketë asnjë ndërprerje të energjisë elektrike”.A2