Gjashtë të rinj janë proceduar penalisht nga Policia e Tiranës, për protestën e zhvilluar pasditen e djeshme te Kryeministria. Në terren kanë qenë forca të shumta policie, me uniformë dhe civilë.
Rasti i shoqërimit të një të riu nga Policia është filmuar nga qytetarët që ndodheshin pranë tij. Katër efektivë civilë të Policisë e kanë marrë atë forcërisht për ta shoqëruar në zonën e “Zogut të Zi”, por rezistenca e tij ka bërë që aty të mblidhen shumë qytetarë e efektivë.
Siç shihet dhe nga pamjet, aty ka shkuar dhe vetë kryepolici i Tiranës Lorenc Panganika, i cili u ka kërkuar efektivëve të ndalonin, e po ashtu të riut i ka kërkuar që të qetësohej. Madje, ky i fundit në disa momente kërkon policinë për ndihmë pasi nuk e dinte cilët ishin personat që po tentonin ta shoqëronin.
