Kuvendi i Shqipërisë u mblodh sot në një seancë plenare, ku u miratua rezoluta për mbështjetjen e sovranitetit territorial të Ukrainës, kundër agresionit rus.
I veshur me ngjyrat e flamurit, parlamenti është solidarizuar me Ukrainën.
Të gjithë deputetët në sallë janë ngritur në këmbë dhe kanë duartrokitur në shenjë solidarizimi për shtetin i cili është në ditën e 12 të tij përballë sulmit të presidentit të Rusisë Vladimir Putin.
I pranishëm në këtë seancë plenare është edhe ambasadori i Ukrainës në Tiranë, Volodymyr Shkurov i cili është përlotur gjatë duartrokitjes së deputetëve.
