Në kohën që kanë mbetur vetëm 5 kuti për të numëruar nga bashkia e Shkodrës, kandidati i koalicionit “Shtëpia e Lirisë”, Bardh Spahia ka folur si fitues i garës së zgjedhjeve të pjesshme vendore.
Ai ka falenderuar të gjithë njerëzit që e mbështetën, ndërsa dha mesazhe përbashkimi mes shkodranëve dhe jo vetëm, pavarësisht krahut politik.
“Në këtë ditë historike, ditë shprese për të gjithë demokracinë shqiptare, për opozitarizmin e vërtetë shqiptar dhe jo vetëm shkodran, dua ta nis me falënderim nga zemra për të gjithë demokratët, qytetarë e bashkisë së Shkodrës, për vlerësimin që më dhanë. Dua të falënderoj dhe aleatët tanë për luajalitetin që bënë për të arritur fitoren.
Falënderim nga zemra shkon për të gjithë gazetarët, që e transmetuat me profesionalizëm këtë garë, por dhe për atë trupë të jashtëzakonshme komisionerësh për mos tjetërsimin e vullnetit të qytetarëve të Shkodrës. Dua të falënderoj nga zemra stafin e shtabit elektoral dhe këtë rini të jashtëzakonshme që i dhanë energji kësaj gare elektorale. Me falënderimin e përzemërt ndaj qytetarëve të bashkisë sonë, dua t’u garantojë se nga nesër do të jem kryebashkiaku i të gjithë qytetarëve të Shkodrës.
Një thirrje kam dhe për ata që nuk zgjodhën për të më votuar mua dhe për ata demokratë që ndoshta humbën rrugën, dera jonë, dera e shumicës, do të jetë e hapur, për shkodranët dhe jo vetëm. Nga sot në Shkodër nis ndryshimi i ri. Do të komunikoj siç duhet, do identifikoj prioritetet dhe do i jap zgjidhje. Jemi këtu për të vlerësuar forcën që garanton vota e lirë. Vumë në piedestal forcën e votës së lirë. Do të komunikoj siç duhet, do identifikoj prioritetet dhe do i jap zgjidhje. Jemi këtu për të vlerësuar forcën që garanton vota e lirë. Vumë në piedestal forcën e votës së lirë.”, tha ai.
