Ministria e Ukrainës: Kemi vr arë 4300 ushtarë rus dhe shkatërruar 146 tanke 

Zëvendësministrja e Mbrojtjes e Ukrainës, Hanna Malya, ka bërë me dije se rreth 4,300 ushtarakë rusë janë vrarë gjatë sulmeve luftarake në Ukrainë.

Ajo pranoi po ashtu se ky numër ende është duke u shqyrtuar dhe se mund të përditësohet nga momenti në moment. Mësohet se deri më tani Ukraina ka sulmuar 146 tanke, 27 avionë dhe 26 helikopterë.

Sakaq, sot trupat ruse hynë në Kharkiv , qyteti i dytë më i madh i vendit, ku po luftojnë ushtarët ukrainas në rrugë. Autoritetet lokale në qytetin verilindor konfirmuan se automjetet e lehta ruse kanë shkelur qendrën e tij dhe po u bëjnë thirrje civilëve të qëndrojnë në vende strehimi.

Presidenti i Ukrainës Volodmyr Zelensky ka refuzuar ofertën e Moskës për t’u takuar për bisedime në Bjellorusi.

Kievi thotë se është gati që të nisë negociatat me Rusinë diku tjetër, por jo në Bjellorusi pasi vendi po përdoret nga Rusia për të nisur pushtimin e saj në Ukrainë.
Mëngjesin e kësaj të diele, Zelensky njoftoi se Ukraina po krijon një legjion “ndërkombëtar” vullnetarësh për të huajt të cilët dëshirojnë t’i bashkohen ushtrisë ukrainase në luftën kundër forcave ruse.

Mbretëria e Bashkuar shprehet se pavarësisht përparimeve nga drejtime të shumta në Ukrainë, ajo beson se forcat ruse po hasin “rezistencë të ashpër” nga ushtria e vendit.

Sipas vlerësimeve të inteligjencës nga Londra, luftimet vijuan mbrëmë në Kiev, por me një intensitet më të ulët se natën e kaluar.  Civilët ukrainas janë përpjekur të bllokojnë përparimin e forcave ruse në mënyrë paqësore.