Në shenjë solidariteti me Ukrainën, monumentet në të gjithë botën kanë marrë ngjyrën e verdhë dhe blu të flamurit ukrainas, pas fillimit të pushtimit rus ditën e enjte.
Në Bruksel, parku Cinquantenaire u ndriçua gjatë një samiti të Bashkimit Europian mbi krizën Rusi-Ukrainë në kryeqytetin belg ditën e enjte. Pas takimit, krerët e Bashkimit Europian njoftuan paketën e parë të sanksioneve kundër Rusisë.
Stacioni Flinders Street i Melburnit u ndriçua nga ngjyrat e flamurit ukrainas në shenjë solidariteti për vendin. Pushtimin rus, kryeministri australian Scott Morrison e quajti “brutal” ndërsa njoftoi sanksione të reja kundër Moskës.
Sakaq, Orkestra Filarmonike Çeke mori një ovacion të gjatë kur ata kënduan himnin çek dhe ukrainas para koncertit të tyre në Pragë ditën e enjte.
