“E suksesshme dita e parë” Protesta në Rusi kundër luftës në Ukrainë, mbi 700 të arrestuar

Më shumë se 700 persona janë arrestuar nga policia ruse, në protestat kundër luftës të mbajtura në disa qytete në të gjithë vendin.

Tubimet u organizuan në 40 vende të ndryshme, duke përfshirë dhe kryeqytetin, Moskën.

Uniformat blu u kanë kërkuar protestuesve që të largohen nga Sheshi Pushkinskaya në Moskë, duke thënë me altoparlantë se protesta është e paautorizuar.

Autoritetet ruse të enjten paralajmëruan qytetarët se pjesëmarrja në protestat kundër luftës mund të çojë në ndjekje penale dhe akuza penale.

Nderkohe një zëdhënës i ministrisë së mbrojtjes së Rusisë thotë se ushtria e vendit ka arritur qëllimet që kishte vendosur për ditën e parë të pushtimit të Ukrainës. “Të gjitha detyrat që iu caktuan grupeve të trupave të Forcave të Armatosura të Federatës Ruse për atë ditë u kryen me sukses,” tha Igor Konashenkov.