Deputeti i Partisë Demokratike Dashnonr Sula i ka bërë sot thirrje SPAK nga foltorja e Kuvendit që të vendosë përpara drejtësisë të gjithë zyrtarët që janë të përfshirë në aferën e inceneratorëve.
Ai deklaroi se “Nëse ka nga opozita e sotme që ka future duart në fondet publike, na merrni dhe na çoni në SPAK. Por ju nuk keni çfarë ti kapni këta opozite. Ministrat dalin këtu dhe akuzojnë. Si mund të dalësh këtu dhe të akuzosh ndërkohë që e di fort mirë që inceneratori i Elbasanit nuk funksionon, vetëm për vitin 2021 ka përpunuar 11% të mbetjeve të të gjitha qarkut. SPAK-un e mbështesim si opozitë dhe kam bindjen e plotë se prokurorët e SPAK do bëjnë të pamundurën dhe do vihen para përgjegjësitë të gjithë personat e përfshirë dhe kanë ngjyer gishtat e duart në këtë aferë”.
“Nuk është e gjithë maxhoranca e korruptuar, nuk e kam për turp fare ta them që ka dy vajza të reja në qeveri që ua thashë edhe një ditë në komision: ju lutem mos u prishni si ministrat e tjerë të qeverisë që kanë përfituar. Sepse në fund të fundit, kemi një mision që ta rregullojmë këtë vend se këtu do jetojmë ne, do jetojnë fëmijët tanë dhe nipërit tanë”.
Sula solli edhe dy shembuj se si investime të qeverisë prej 3.2 milionë dollarë, të pesë viteve më parë tani i kishte marrë lumi dhe nuk kishte më shenja të tyre.
“Shikoni këto foto, janë hedhur 1.1 milionë dollarë në lumin Shkumbin në 2017 për një pritë që gjoja do bëhej që të pengoheshin mbetjet që të shkonin në det dhe nuk ekziston prita, u zhduk brenda dy muajve. Ka ngelur vetëm një godinë nga ky investim 1.1 milionë dollarë. Sfidoj këdo që të shkojnë ta shohin vendin atje. 2.1 milionë dollarë një tjetër investim, prapë nuk e kryen funksionin. Pra 3.2 milionë dollar, i vodhi opozita? i bëj thirrje edhe SPAK që të shkojë ta verifikojë se aty është, nuk ekziston më investimi. Jemi ne fajtorë pse denoncojmë? Babëzia i’u ka arritur deri në atë pikë sa që nuk iu shohin më sytë, e keni bërë si perde hekuri përpara”, tha ai.
