Ish-kryeministri Sali Berisha bëri sot një deklaratë të fundit para Kuvendit.
Ai u shpreh se gjatë një hetimi të policive të katër shteteve të Bashkimit Europian janë zbuluar lidhje mes qeveritarëve, drejtorëve dhe prokurorëve në Shqipëri me element kriminalë vendas dhe të huaj.
Berisha iu referua thyerjes së kodit të një aplikacioni të posaçëm për komunikime të kriptuara që u bë fillimisht nga policia belge dhe më pas nga policitë e Italisë, Gjermanisë dhe Francës përmes të cilave ata zbuluan lidhjet mes grupeve mafioze.
Sipas tij, në këto komunikime të zbardhura tashmë janë gjetur edhe mesazhe të mafiozëve me politikanë të lartë në Shqipëri.
“Hetimi i fundit i kryer nga disa shtete, në Itali, Belgjikë, Gjermani, Francë, pas zbulimit të një aplikacioni që përdornin bandat shqiptare dhe politikanët shqiptarë për komunikime të fshehta themelet e narkoshtetit po dridhen si tërmet.
Në ato përgjime ka emra ministrash, drejtorë, prokurorë, gjykatës e shumë të tjerë.
E mirëpres si një zhvillim shumë i rëndësishëm. Bëj thirrje për një hetim të pavarur. I bëj thirrje Antimafies Italiane të hetojë me gjithë potencialet e saj aferën e inceneratorëve në Shqipëri. Në të cilën koka e Meduzës është Edi Rama. Por, edhe sekretari Don Agaçio, antimafia të hetojë dhe këtë çështje”-tha Berisha.
