Angli Stafuka, 21 vjeç është rikthyer sërish në burg pasi Gjykata e Lartë ka prishur një vendim të Gjykatës së Apelit Shkodër, e cila e la të lirë të riun ndonëse kishte prova se ai kishte vendosur tritol në një pallat në ndërtim në Shëngjin.
21-vjeçari nga Fushë Kruja në bashkëpunim me Erald Pajtani (i ndaluar gjatë operacionit “Eksplozivi”, në dhjetor 2020), më datë 19.11.2020 në Shëngjin, dyshohet të ketë vendosur në një nga kolonat e një objekti në ndërtim, në pronësi të shtetasit Liman Gjoka një sasi lënde plasëse, nga shpërthimi i së cilës u shkaktuan dëme materiale.
Në datën 30 qershor 2021 u bë kapja dhe ndalimi i shtetasit Angli Stafuka, 21 vjeç, banues në Fushë Krujë.
I riu ankimoi vendimin për burg në Gjykatën e Apelit dhe kjo e fundit e la të lirë. Palët e tjera të përfshira në proces nuk kanë rënë dakord për daljen nga qelia të Angli Stafukës dhe e kanë çuar çështjen në Gjykatën e Lartë.
Shkalla më e lartë e drejtësisë në Shqipëri prishi vendimin e Apelit të Shkodrës dhe këtë të mërkurë Angli Stafuka është arrestuar nga Policia, pasi vendimi është i formës së prerë dhe ekzekutohet menjëherë.
