Përfundon mbledhja e Bashës me aleatët, Mediu: Hyjmë në zgjedhje pas 6 muajsh vetëm me një kusht

Ka përfunduar mbledhja e kryetarit të PD Lulzim Basha me aleatët në selinë blu.

Pas mbledhjes kryetari i Partisë Republikane ka folur përpara gazetarëve për arrestimet e ish-deputetit të PD dhe zyrtarëve të tjerë si edhe ka deklaruar se protestat e Partisë Demokratike do të vazhdojnë.

“Arrestimet e protestuesve na kthejnë në kohën e diktaturës. Nëse Rama kur erdhi kryeministër e gjeti Shqipërinë në NATO sot vendi është shumë më keq. Shqiptarët duhet të reagojnë. Protesta e aksionet e PD-së do të vijojnë. Rama duhet të ikë që të mos pengojë integrimin e vendit. Ne kemi thënë që  duhet të ikë Rama, duhet qeveri tranzitore”, u shpreh Mediu.

Ndër të tjera Fatmir Mediu ka theksuar se opozitarët i qëndrojnë kërkesës së tyre për të shtyrë zgjedhjet deri në 6 muaj, me qëllim që ato të zhvillohen kur Edi Rama mos të jetë më kryeministër.

“Nqs Edi Rama e gjeti Shqipërinë vend anëtar të NATO dhe me viza të liberalizuara sot po shkojmë hapa pas. Shqiptarët duhet të çohen. Ne kemi thënë që është e mundur që brenda 6 muajve të zhvillohen zgjedhjet me largimin e Edi Ramës dhe me një qeveri tranzitore.”, shtoi kryetari i PR.