LIGJET E BIZNESIT
Orgest Bilbili, i konsideruar si një nga më “të fortët” e Lushnjes, është dënuar sot me burgim të përjetshëm nga Gjykata Kundër Krimit të Organizuar.
Por pavarësisht këtij vendimi, merita më e madhe i takon policit të Shqiponjave, i cili i vuri prangat në prill të vitit 2020, kur Shqipëria ishte e izoluar për shkak të pandemisë.
Deri në atë kohë forcat RENEA kishin organizuar 7 operacione në Lushnje dhe rrethinat e qytetit për të vendosur në pranga Orges Bilbilin, por pa rezultat. Në të gjitha këto operacione të rëndësishme të RENEA-s Orges Bilbili dhe shoku i tij Laert Haxhiu i kanë shpëtuar arrestimit. Por, gjithçka do të ndryshonte në ‘takimin’ e rastësishëm me efektivin e repartit Shqiponja.
Në rrugën ” Sitki Çiço”, në afërsi të një shkolle, efektivi i policisë duke qenë kohë pandemie, i ka kërkuar një shtetasi lejen e daljes dhe dokumentin e identifikimit. Por ai ka kundërshtuar efektivin dhe ka tentuar të largohet në brendësi të lagjes. Efektivi i repartit Shqiponja i është vendosur pas dhe gjatë ndjekjes 30-vjeçari i ka drejtuar pistoletën punonjësit të Policisë, duke e kërcënuar për ta vrarë. Efektivi i ka kërkuar që të hedhë armën dhe të dorëzohet, por Orgest Bilbili nuk i është bindur urdhrit dhe ka vijuar lëvizjen me pistoletë në dorë.
Në zbatim të procedurës standarde të punës, punonjësi i Policisë ka qëlluar njëherë në ajër për ta paralajmëruar, ndërkohë që 30-vjeçari i ka drejtuar armën, për të qëlluar punonjësin e Policisë. I gjendur përballë kërcënimit, punonjësi i Policisë ka qëlluar në drejtim të 30-vjeçarit, duke e plagosur atë. Pas arrestimit u identifikua se ai ishte i shumëkërkuari i drejtësisë Orges Bilbili i cili ishte kthyer në tmerrin e Lushnjes përgjatë 4 viteve të fundit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Në vitin 2017 Orges Bilbili dhe Laert Haxhiu vranë Jurgen Hoxhën dhe Zamir Latifin. Në atë kohë ngjarja e rëndë u konsiderua si “Masakra e Lushnjës”, ku shënjestër ishte vrasja e nipit të Aldo Bares, Xhulio Shkurti. Por ky i fundit arriti t’i shpëtojë atentatit.
Me këtë vrasje filluan edhe përplasjet në Lushnjë ku kanë ndodhur disa atentate dhe plagosje përgjatë tre viteve të fundit.
Orges Bilbili dhe Laert Haxhiu i cili vijon të jetë në kërkim ndërkombëtar janë të njohur si rivalët e nipave të Aldo Bares.
Ndërkaq, vrasja e ndodhur në tetor të 2019-së, e Enver Boriçit, dajës së Zamir Latifit të vrarë në 2017-në, dyshohet se qëndronin pikërisht Orges Bilbili dhe Laert Haxhiut, por asnjëherë nuk u gjetën prova.
Me gjithë kërkimet e shumta të RENEA-s, Orges Bilbili nuk u arrit të kapej deri ditën kur u përball me efektivin e Shqiponja i cili arriti të neutralizojë të fortin e Lushnjës, duke bërë që sot gjykata t’i japë dënimin përjetë.
