Biznesi është agjenti kryesor në ekonomi. Është ai që hap vende pune dhe kontribuon në buxhetin e shtetit me taksa e tatime. 2021 u konsiderua për ekonominë shqiptare si viti i rimëkëmbjes, pas recesionit pandemik të një viti më parë. Ajo që pritet është një rritje ekonomike prej 7.6%. Por sa e ka ndjerë biznesi? Sot përfaqësuesit e disa shoqatave kanë dalë kundër liberalizimit të tregut të energjisë, ku me vendim qeverie duke filluar nga 1 janari rreth 7300 biznese do të dalin në treg të lirë për ta blerë vetë energjinë elektrike, dhe jo me çmim të paracaktuar nga Enti Rregullator i Energjisë siç ka qenë deri më tani.
Për sipërmarrjen kjo do të çojë në rritje të kostove. Por si është gjendja e biznesit shqiptar sot? Prej nga ku mund të kuptohet edhe gjendja e ekonomisë reale dhe rrjedhimisht, edhe mijëra të punësuarve në këto kompani.
Për këtë çështje u diskutua këtë të mërkurë në A2 Business me gazetaren Aurora Sulçe ku e ftuar ishte ministrja e Mbrojtjes së Sipërmarrjes, Edona Bilali. “Ne jemi ende duke vuajtur pasojat e pandemisë. Situata në përgjithësi është duke u menaxhuar dhe për sa kohë ka komunikim të vazhdueshëm mes bizneseve dhe qeverisë, e cila dëgjon problematikat e tyre”.
Por cilat janë shqetësimet që rëndojnë në biznesin shqiptar? “Përveç këtyre që nuk varen as nga biznesi dhe as nga qeveria, do të shtoja disa faktorë të tjerë, siç është burokracia e marrjes së shërbimeve, kjo e lidhur veçanërisht me hipotekat. Është një kërkesë e vazhdueshme e biznesit për të qenë më proaktiv. Një gjë që mund ta them me siguri, akoma administrata publike nuk arrin që të jetë në të njëjtën nivel shpejtësie reagimi si biznesi. Nëse biznesi ka një plan investimi afatshkurtër edhe qeveria duhet të jetë në gjendje që t’i përshtatet të njëjtit ritëm”, u shpreh ministrja.
