Dueli mes Liverpulit dhe Milanit bën nostalgjik për një personazh të njohur të futbollit që ka përjetuar si protagonist të dyja sfidat e mëhershme në Ligën e Kampioneve mes skuadrave.
Pipo Inzagi, doli i humbur nga e para, por u hakmor në mënyrën e tij tek e dyta duke i dhënë suksesin me 2 gola Milanit në finalen e 2007-s.
“Shpresoj të shkoj në “San Siro” pasi më sjell kujtime të pabesueshme. Një ndeshje që vlen të gjithë karrierën, ndeshjen e jetës time.
Milani kthehet të shkelë në skena që meriton dhe në një moment kur është një skuadër e vërtetë që mund të thotë fjalën e saj edhe në ndeshje si kjo, edhe pse kundërshtari është ndër më të padëshiruarit e mundshëm. Nga këto ndeshje mund të rritesh e mësosh siç ndodhi vitin e kaluar kundër Mançesterit në Ligën e Europës. Shpresoj që Milani të bëjë mirë dhe kështu përmirësohet ndeshje pas ndeshje”, tha Inzagi sot para ndeshjes, duke kujtuar atë periudhë.
