“Tani do të jetë më e lirë” Rama fton Merkelin që të rikthehet në Shqipëri: Të shijojë diellin dhe humorin, e kemi më mirë se BE

Në konferencën e përbashkët për shtyp me kancelaren gjermane Angela Merkel, kryeministri Edi Rama shprehu mirënjohje për mbështetjen e saj ndaj Ballkanit Perëndimor.

Ai gjithashtu shtoi se është privilegj dhe nder që ka mundësinë të njihet me Merkel dhe të mësojë prej saj.

Gjithashtu, Rama e ka ftuar kancelaren për një vizitë tjetër në Ballkan dhe Shqipëri, për të shijuar diellin dhe humorin e këtij rajoni, pasi sipas tij në këtë fushë jemi përpara Bashkimit europian.

“Unë dua ti shpreh mirënjohje, falenderim në emër të të gjithë shqiptarëve për atë që Gjermania ka bërë për vendin tonë. Dhe atë që ajo personalisht ka bërë për rajonin. Nga ana tjetër duke e respektuar faktin që është një lider që drejton Gjermaninë prej vitesh por asnjëherë nuk ka munguar që t’i japë zemër politikës europiane. Por është gjermane, kohën e ka të shtrenjtë, oraret i ka të rëndësishme. Ballkani Perëndimor është një vend shumë më i mirë para se Merkel të niste Procesin e Berlinit.

Ma ha mendja që interesi i të gjithëve është që të dëgjojmë fjalët e saj. Ishte privilegj dhe nder, që unë të kisha këtë detyrë në të njëjtën kohë me të. Të kisha mundësinë të njihesha me të dhe të mësoja prej saj. Sipas meje, sot është një moment kur të gjithë ne jemi të vetëdijshëm qoftë për atë që ajo ka bërë, qoftë edhe për boshllëkun që ajo la. Pa Merkel, Ballkani nuk do të ishte njësoj. Pavarësisht sfidave dhe problemeve.

E fundit kancelarja, tani do të jetë më e lirë dhe shpresoj që të ketë kohën dhe dëshirën që të rikthehet në Ballkan dhe Shqipëri, për të lexuar më nga afër realitetin tonë, e për t’u shpërblyer me diellin e humorin e Ballkanit. Të paktën në këtë fushë jemi para BE”, u shpreh Rama.