Ka degraduar në gjendje më të rëndë situata te zona e “Selvisë” në Tiranë, ku INUT ka shkuar për të shembur disa banesa. Rasti është denoncuar si skandaloz nga pronarët, pasi përveçse ata kanë të gjithë dokumentacionin e rregullt, shembja ka ndodhur pa asnjë paralajmërim dhe pajisjet dhe mallin në brendësi.
Por jo vetëm kaq, pasi disa prej banorëve të këtyre ndërtimeve kanë vendosur të ngujohen brenda tyre për të ndaluar në këtë mënyrë shembjen. Por as ky veprim nuk i ka ndalur punimet me INUT që ka vijuar duke thyer xhamat e ndërtesës, ndërkaq 3 personat të cilët ishin brenda në shenjë rezistence janë shoqëruar nga efektivët e policisë, raporton Fax News nga terreni.
Njëri prej pronarëve të ndërtesave, Gani Kajtazi paralajmëroi një kallëzim penal në adresë të Bashkisë Tiranë për këtë veprim.
“Këto janë ndërtime që në 1989. Nuk na kanë lajmëruar fare. Qytetarët e ndryshëm na kanë marrë në telefon dhe na kanë thënë që po na prishin lokalin. Ne do të bëjmë kallëzim penal ndaj Bashkisë së Tiranës që nesër në mëngjes. Nuk ka pasur asnjë lajmërim për këtë prishje, ndaj unë do të ndjek rrugën ligjore. Ne jemi dy persona, të dy me leje ndërtimi, gjithçka e kemi në rregull. Vetëm ne na kanë prishur të tjerët jo”, deklaroi ai për Fax News.
Ndërkohë një tjetër pronar ka kërcënuar edhe me vetëflijim. “Ne disponojmë 2 biznese, me letra të rregullta, me tokë të blerë. Dhe vijnë na e prishin biznesin pa asnjë lajmërim pa asgjë. Nuk jemi njoftuar as për të hequr objektet brenda bizneseve.”
