LIGJET E BIZNESIT
Pas arrestimit nga policia në Kosovë të bashkëshortit të saj Dardan Molliqaj, ka reaguar dhe ish-ministrja e Arsimit në Shqipëri Besa Shahini.
Sipas saj protesta e aktivistëve të PSD u mbyll me dhunë policore, aq në shpërputhje me aksionin e pjesëmarrësve, sa nuk ishte parë që nga koha e UMNIK.
Ndër të tjera Besa Shahini akuzon kryeministrin e Kosovës Albin Kurti se po tenton të shuajë çdo zë opozitar në vend.
“Nevoja e Albinit që të shuajë çdo zë opozitar në Kosovë ka kaluar në absurditet. Pesë aktivistët në aksionin simbolik kundër gjykatës së padrejtë speciale – tashmë e shndërruar në gjykatë kundër UÇK-së – u rrahën dhe arrestuan dhunshëm”, shkruan Shahini e cila thekson se aktualisht në Kosovë ‘nevoja dhe hapësira për opozitë të re dhe të zëshme po vjen duke u rritur’.
Kjo nuk është hera e parë që Molliqaj arrestohet nga policia. Sot, bashkë me të u ndaluan edhe pesë aktivistë të kësaj partie, pasi kanë penguar konferencën për media të kryetares së Gjykatës Speciale, Ekaterina Trendafilova.
MESAZHI I PLOTE:
Nevoja e Albinit që të shuajë çdo zë opozitar në Kosovë ka kaluar në absurditet. Pesë aktivistët në aksionin simbolik kundër gjykatës së padrejtë speciale – tashmë e shndërruar në gjykatë kundër UÇK-së – u rrahën dhe arrestuan dhunshëm.
Në korrik ndodhi e njejta, kur Albini nxorri policinë për të mbrojtur një taksë absurde shtesë të regjistrimit të makinave, të cilën e tërhoqi më vonë.
Para kësaj, u organizua një protestë e vogël kundër hipokrizisë së VV-së e cila bëri fushatë të hapur elektorale, të rrezikshme për shëndetin midis pandemisë dhe menjëherë pasi fitoi zgjedhjet vendosi masa të rrepta duke u thirrur në pandemi, që rezultuan në mbyllje biznesesh dhe gjobitje marramendëse të qytetarëve.
Protesta u mbyll me dhunë policore, aq në shpërputhje me aksionin e protestuesve, sa nuk ishte parë që nga koha e UNMIK-ut.
Nëse nuk i shuan me dhunë, Albini nxjerr ministrat e vet në protestë, për ta përvetësuar kauzen, siç ndodhi me daljen e turpshme të ministres së drejtësisë dhe atij të brendshëm në protestat kundër vrasjes brutale të një gruaje të re nga partneri i saj.
Shëndeti i demokracisë në Kosovë është në pikën e vet më të brishtë që nga paslufta. E vetmja fije shprese është fakti që nën pushtetet e dhunshme, pashmangshëm rritet e forcohet opozita.
Kështu që paradoksalisht, nevoja dhe hapësira për opozitë të re dhe të zëshme po vjen duke u rritur.
