Mark Marku, i cili tashmë nuk është më deputet, ka treguar kundërshtitë që kishte pasur me PD për listat e demokratëve në qarkun e Lezhës.
Ai tha në “Opinion” se kishte qenë kundër Bashës dhe Bardhit sa i takon emrit të Elda Hotit, e cila do të zërë tanimë vendin e tij në Kuvend.
“Për zonjën Hoti nuk e dija fare sepse kisha propozuar një djalë të mirë, mësues, duke i thënë se nuk do jesh te lista fituese por do të promovoj. Në një moment e heqin dhe fusin këtë Eldën që unë nuk ia kisha dëgjuar emrin. Nuk e dija që ishte deputete. Më thanë të fusim këtë. Lulzim Basha dhe Gazment Bardhi e kanë futur.
U thashë nuk e njoh kush është kjo. Është deputete më thanë, aq më keq u thashë, nuk e njeh askush. Deputete e LSI-së, u thashë por a jeni në vete!. Kishte qëndruar në Parlament duke thyer vendimin e opozitës. U thashë absolutisht jo. Mbas një dite më thanë nuk kemi çfarë ti bëjmë aleatit, e futën përmes partisë së Mediut. Nuk e dija që do dilte ajo, i pesti atje është Zef Gjoka, një nga burrat më te nderuar të Lezhës“, u shpreh Mark Marku.
