LIGJET E BIZNESIT
Institucionet financiare të borxhit janë kthyer në një kamxhik për qytetarët shqiptarë. Abuzimi më i fundit është denoncuar nga zv.kryeministri Erion Braçe, ku një kompani borxhesh sipas tij i ka bllokuar rrogën dhe i kërkon dyfishin e borxhit të marrë një të riu, që mbi të gjitha është edhe student.
Ka qenë vetë studenti ai i cili ka dërguar një mesazh tek zv.kryeministri, ku tregon edhe problemin me të cilin ndeshet. Ai thotë se ka marrë një kredi në vitin 2019, në një institucion jo bankë, por për shkak se e zuri virusi, nuk mundi të paguante këstet nga janari deri në muajin maj.
Për këtë arsye kredia kaloi në përmbarim dhe tani i kërkojnë dyfishin e borxhit, si dhe i kanë bllokuar rrogën.
“Për 3-4 muaj likuidime të papaguara, tani më kërkojnë edhe 3 milionë të tjera, ose më bllokojnë rrogën, të vetmin burim që kam”, shkruan student.
Zv.kryeministri shkruan se këto borxhe janë kthyer në makth për qytetarët, ndërsa bëhen me kontrata të paqarta, e që në fund, qytetarët dhe bujqit i shquajnë si grabitje.
Ai vë theksin edhe tek nevoja e ngritjes së një agjencie publike për mbrojtjen e konsumatorëve, pasi për momentin nuk ka asnjë institucion të ngarkuar për këtë.
Denoncimi i Erion Braçes
Jeni ndjerë të mashtruar dhe grabitur me borxh të shpejtë? Urdhëroni lexoni në foton e dyte; është mesazhi që mora sot nga një student që edhe punon. Ka marrë një borxh të shpejtë në një institucion financiar borxhi, jo bankë dhe borxhi po e mbyt! E zuri kriza e COVD në 2019-2020, nuk mundi të vijonte pagesat e rregullta nga shtatori në janar, vunë në lëvizje përmbarimin, tani i kërkojnë dyfishin e borxhit të marre, i bllokojnë rrogën duke e zhytur në një gropë edhe më të thellë se ajo ku ishte kur mori një borxh te shpejte!.
Kush i mbron këta te rinj, studente? Askush! Janë nën kamxhikun e ashpër të këtyre institucioneve financiare të borxhit. Askush nuk e di sa shume janë! Po flas vetëm për këto institucione, në periferi të mbikëqyrjes financiare por te shtrira kudo në lagje qytetesh të mëdha, në qytete të vogla, madje deri nëpër fshatra. Janë kthyer në makth borxhet e tyre të shpejta, me kontrata të paqarta, të dyshimta e që ne fund qytetarët por edhe bujqit i shquajnë si grabitje! Duhen mbrojtur njerëzit, nuk mund të grabiten kështu! Deri tani, nuk ka asnjë institucion të qarte që mbron konsumatorin financiar nga këto institucione, nga këto borxhe dhe procedura që duken ai grabitje. Nuk ka as transparence, as qartësi! Duhet të ndertojmë një agjenci te re, publike, e cila te mbrojë konsumatorin nga borxhe te tilla, të dyshimta e jo të qarta, të institucioneve jo banka por edhe te bankave vetë! Duhet bërë tani para se rreshti i njerëzve nën këtë regjim borxhi të bëhet shumë shumë i gjate dhe fatalist!
