Frida Krifca ishte një nga pak emrat e rinj dhe të panjohur ndoshta për shumë nga publiku i gjerë, që kryeministri Edi Rama njoftoi si pjesë e ekipit të tij qeverisës pak ditë më parë.
Por sipërmarrësi dhe mjeku veteriner Ervin Resuli në një reagim për emërimin e saj tregon se Frida Krifca ka drejtuar AZHBR prej vitit 2018 “nga ku kishte mjaft kohë për të na treguar sa i vlen lëkura”, shton ai.
“Unë me zonjën në fjalë NUK kam asgjë personale si Ervin, por si një fermer do kem gjithmonë me këdo që do abuzojë me detyrën dhe nuk do kryejë detyrën për të cilën paguhet. Lëkura e shqiptarëve vlen më shumë se lëkura e një ministri të emëruar befasisht,“-shkruan Resuli.
Shkrimi i plotë
ÇFARË KAM UNË PERSONALE ME MINISTREN E RE TË BUJQËSISË
(Do e paguanit ju një shkollë që fëmijës tuaj nuk i ofron asgjë?)
Frida Krifca ka drejtuar AZHBR prej vitit 2018 nga ku kishte mjaft kohë për të na treguar sa i vlen lëkura.
Nga institucioni të cilin deri sot Krifca ka drejtuar kanë dalë 16 milion euro, 6 milionë për bujqësinë skema kombëtare po fusim këtu dhe 10 milion për skenën e naftës
Në të njëjtën kohë Kosova ka dhënë 50 milionë euro ndërsa Mali i Zi 44.8 milion euro .
Po ashtu, nga skema e IPARD janë thithur mjaft fonde për industrinë e qumështit, pra në ndërtimin e fabrikave me standard evropian, por nga ana tjetër ato kërkojnë lëndë të parë duke mos e gjetur e për rrjedhojë duke importuar qumësht nga Ballkani pasi blegtoria gjatë mandatit të dytë të Ramës ka pësuar ulje të jashtëzakonshme.
Dhe pas gjithë këtyre dështimeve, zonja Krifca duhet të jetë përgjegjëse edhe për fermerët, blegtorët dhe shëndetin e konsumatorëve.
Me sa duket, shkalla matëse e aftësive nga kryeministri ose le shumë për të dëshiruar ose ai di mirë të zgjedhë njerëz të paaftë në mënyrë që të ketë pushtet absolut.
Unë me zonjën në fjalë NUK kam asgjë personale si Ervin, por si një fermer do kem gjithmonë me këdo që do abuzojë me detyrën dhe nuk do kryejë detyrën për të cilën paguhet.
Lëkura e shqiptarëve vlen më shumë se lëkura e një ministri të emëruar befasisht.
