Deputeti i Partisë Demokratike Ervin Salianji ka folur rreth riemërimit si ministër Mbrojtje të Niko Peleshit nga ana e Edi Ramës në mandatin e tretë qeverisës.
Salianji thekson se Peleshi nuk duhet të ishte sot ministër, por i pandehur para drejtësisë.
Sipas tij ai ka lejuar që një sasi e madhe e pesticidit Silicon Mix të shitej si pleh kimik në kohën që ishte ministër Bujqësie.
REAGIMI I PLOTE:
Në qeverinë e ricikluar ofrohet dhe mbrojtje për Niko Peleshin!
Prej 2 vitesh, ndaj tij qëndron një dosje në SPAK, për përdorim pesticidesh të rrezikshme. Një sasi e madhe pesticidi me emrin ‘Silicon Mix’ shitej në Shqipëri si pleh kimik, gjatë kohës kur Peleshi ishte Ministër i Bujqësisë.
‘Silicon Mix’ ishte bllokuar nga AKU, por me një udhër të ish-ministrit Niko Peleshi, bllokimi u hoq dhe në treg u shitën 4600 kilogram kimikat.
Skandali është evidentuar nga ana e Kontrollit të Lartë të Shtetit, i cili akuzon ish-ministrin se ka shkelur ligjin.
Si mundet të bëhesh Ministër, kur ke helmuar qytetarët me pesticide si Silicon Mix?
Peleshi sot duhet të ishte i pandehur dhe me mbrojtës para gjykatës por mbrohet dhe promovohet si Ministër i Mbrojtjes.
Niko Peleshi duhet të dalë sa më parë para drejtësisë për helmim të produkteve ushqimore.
