“Shqiptarët nuk donin të ishte më anëtar qeverie” Arben Malaj nxjerr emrin e ministrit që do shkaktojë trazira në Vlorë

Ish-ministri socialist i Financave Arben Malaj ka komentuar kabinetin e ri qeverisës që Rama njoftoi sot në Asamblenë Kombëtare të partisë.

Ai u shpreh se nuk ndihet mirë që në politikë nuk po futet ende një kulturë e re.

Malaj shtoi se mandati i tretë është i vështirë dhe ka një ritëm më të lartë, ndërsa tha se vendit i duhen më shumë liderë, pasi një i tillë afatgjatë rrezikon në mënyrë absolute korruptimin.

Pjesë nga intervista në Top Talk

Denis Dyrnjaja: Kur sheh emrat, nuk duken politikë, por as teknikë, ç’është kjo?

Arben Malaj: Është riprodhimi i mënyrës që ka ndjekur Rama. ministrat janë njerëz që kanë autoritet publik, marrin njerëz që e kanë fituar besimin e popullit, ndërsa ministra pa profil, për shembull zv kryeministër është bërë një njeri i cili në të gjitha sondazhet ishte njeriu që shqiptarët nuk donin të ishte me anëtar qeverie.

Denis Dyrnjaja: Pse Rama e bën këtë lëvizje?

Arben Malaj: E bën këtë sepse pushteti absolut ja ka vrarë çdo nerv demokratik dhe ai tani qeveris me arrogancën e pushtetit absolut. Është ajo që më tha një vlonjat duke ardhur këtu, që Ahmetaj është caktuar në Vlorë jo për partinë, po për oligarkinë.

Sepse lufta në Vlorë po bëhet për territore, se kush do menaxhojë hapësirat e reja për portet, modeli i Durrësit apo tjetër, se është e pamundur një qytet aq me shpirt dhe kontribut të menaxhohet nga një mercenar partiak. Tani ai ka zv kryeministër një njeri që shqiptarët thonë mos e bëj as ministër dhe ti japësh në ngarkim Vlorën, nuk e kam personale me të. Në qeveri ka shumë dhe nga ata që vetëm tundin kokën, kontributet e mia dihen. Vlora do reagojë se mënyrë të përsëritur Rama ka hapur gjithnjë shere në Vlorë.