“Duhet të vdesësh, ti dhe babai yt” Djali i Igli Tares publikon mesazhet kërcënuese

Duket se këtë vit tifozët e Lazios po kalojnë çdo limit.

Pas reagimeve të rënda ndaj Elseid Hysajt për një këngë, kanë ardhur dhe kërcënime për Igli Taren dhe familjen e tij.

Këto i ka bërë të ditura vetë djali i ish-sulmuesit të kombëtares shqiptare, Etieni, i cili ka publikuar mesazhet e një tifozi.

“Duhet të vdesësh, ti e babai yt. Copa m… Jeni kanceri i Lacios. Ai babai yt i paaftë. Jeton akoma ai vdekësira, babai yt. Na e shpifni, si ti, ashtu edhe babai yt. Nëse nuk merrni as Zakanjin. Flini me një sy hapur se nëse e kap ndonjë lacial, do i fusë thikën”, – ishte kërcënimi më i fundit që kishte marrë Etien Tare në rrjete sociale.

Ky i fundit u është përgjigjur këtyre kërcënimeve me një postim të tijin. “Jam lacial që kur jam fëmijë, festoj çdo herë që fiton Lacio, dëshpërohem kur humbasim. I vesh këto ngjyra me krenari dhe ndjenjën e përkatësisë.

Respektoj çdo lloj kritike, pasi liria e fjalës dhe e shprehjes janë gjërat më të bukura që ekzistojnë. Por mendoj se këtë herë është kaluar caku. Më vjen keq që lexoj disa fjalë, mund të mos jesh dakord me disa zgjedhje, por nuk duhet të mungojë respekti, KURRË. Ndaj meje, babait tim dhe familjes time”, – ishin fjalët e Etien Tares.