Rama i buzëqeshur në krah të Vuçiç, flet analisti: Ja qëllimi i presidentit serb

Kryeministri Edi Rama është shfaqur sërish i buzëqeshur në krah të presidentit serb Aleksandar Vuçiç.

Të dy u takuan së bashku me kryeministrin e Maqedonisë së Veriut Zoran Zaev në Bled të Sllovenisë.

Treshja është baza e asaj që njihet si Ballkani i Hapur, një nismë që Euroneës e cilëson si kontroverse.

Toby Vogel, analist i Këshillit për Politikat Demokratizuese në Berlin, thotë se për tipa si Rama dhe Vuçiç, kjo iniciativë është vetëm një shfaqje publicitare për të treguar fuqinë e tyre personale, në kontrast me impotencën e BE në rajon.

“Vuçiç po tenton që të diversifikojë. Ai ka tentuar prej kohësh që të fuqizojë marrëdhëniet në rajon- në mënyrë që të mos shihet vetëm si kampioni i serbëve në rajon. Ambicia e Vuçiç është më e madhe. Ai e sheh veten si lider i rajonit,” thotë analisti.

Sipas tij, kjo nismë vjen në një kohë kur BE nuk e pranon zyrtarisht, por nën zë diplomatët thonë se zgjerimi ka vdekur. Ndoshta Serbia dhe Mali i Zi mund t’ia dalin, por për zgjerimin nuk ka më shanse. Për këtë arsye po mendohet për alternativa ndaj integrimit në BE.