Humbi jetën nga shpërthimi me bombol gazi, i jepet lamtumira e fundit 4-vjeçarit shqiptar në Torino

Ditën e sotme në qytetin e Torinos është përcjellë për në banesën e fundit 4-vjeçari shqiptar, Aron Tila, që humbi jetën nga shpërthimi i një bombole gazi në pallatin ku jetonte bashkë me famiiljarët e tij.

Gjatë shpërthimit u plagos lehtë nëna e tij, shtetasja Nertila Tila 34 vjeç dhe disa banorë të tjerë të pallatit.

Arqipeshkopi i Torinos Imzot Cesare Nasiglia i ka dërguar një mesazh lutje, familjes së Aron, ku midis të tjerash thotë se “vdekja tragjike e tij ka tronditur të gjithë. Sytë tanë janë me lot e së bashku ndajmë dhimbjen duke qënë më pranë e më vëllezër me njëri- tjetrin.”

Përmendim faktin se më herët babai i Aronit, Genc Tila ka kërkuar drejtësi për humbjen e djalit të tij, duke u shprehur se dikush duhet të japë llogari për këtë ngjarje.

Ai ka njoftuar se kishte shkuar së bashku me famijjen në Torino për një jetë më të mirë.

“Duam drejtësi në lidhje me ngjarjen. Dikush duhet të japë llogari për vdekjen e djalit tim. Erdhëm në Torino për të nisur një jetë të re. E nuhatëm që në fillim erën e gazit, asgjë nuk funksiononte në atë godinë, sot do të kërkonim një shtëpi të re”, ka pohuar  babai i Aronit, Genci Tila.