“Nuk duhet të dorëzohej” Kadilli ‘shpërthen’ pas dorëheqjes së Mark Markut: U soll me bujë nga jeta publike në atë politike

Mark Marku dha dorëheqjen sot nga mandati i deputetit që fitoi në qarkun e Lezhës.Ai renditi si arsye etapat e njëpasnjëshme të rënies së vazhdueshme të Partisë Demokratike si dhe mosdakordësinë e tij me vendimet e Bashës.Ndërkohë për Fatbardh Kadillin, ky ishte një vendim i fortë dhe drastik të cilin e mirëkuptonte, por për të Marku nuk duhet të dorëzohej por të vijonte luftën brenda PD  për të ringritur partinë.

Kadilli tha se ai pranon dorëheqjen vetëm nga njerëz që kanë përgjegjësi për humbjet dhe degradimin dhe Marku nuk ishte një person i tillë. Në lidhje me arsyet e renditura pse la mandatin, Kadilli tha se Marku bëri reflektimin që në fakt duhet ta kishte bërë Basha.

“E mirëkuptojë Markun pse shkoi në një vendim të tillë drastik dhe sidomos për gjurmën dhe jehonën që krijoi brenda PD. Ky është një vendim i fortë që në thelb ekspozon një krizë të thellë besimi brenda PD dhe mungesën e lidershipit për demokratët. Reflektimi i Markut është reflektimi i munguar i Bashës. Marku u soll me bujë nga jeta publike në atë politike dhe për pak muaj largohet pasi mungon bashkëpunimi politik.  Marku nuk është përgjegjësi dhe nuk duhej të dorëzohej, unë jam për dorëheqje kur kanë përgjegjësi për humbje apo degradim të partisë. Dalja kundër nuk duhet të jetë një qëllim në vetvete, por duhet të ketë një qëllim më të madh, atë të kontributit për ndryshimin e partisë, megjithatë e mirëkuptoj vendimin e Markut”, tha Kadilli.