LIGJET E BIZNESIT
Këtë të mërkurë ka nisur zyrtarisht kontrolli i KLSH-së në zyrat e Emergjencave Civile, pas incidentit të pak ditëve më parë kur punonjësit e emergjencave nuk lejuan auditin pasi kreu i Emergjencave, Haki Cako ndodhej me pushime.
Kontrolli ka nisur në drejtorinë e përgjithshme të emergjencave civile. Po ashtu, kontrolli ka filluar edhe në hallka të tjera të Ministrisë së Brendshme që lidhet me emergjencat civile, në Ministrinë e Mbrojtjes si dhe ato të pushtetit vendor.
Mësohet se me urdhër të kryetarit të KLSH, Arben Shehu, do të auditohen të gjitha tenderimet e viteve të fundit për blerje të paisjeve të emergjencave. Një kontroll i tillë nisi pas zjarreve të fundit ku pati akuza të shumta se punonjësve ju mungonin pajisjet bazë.
Nisja e kontrollit pati një bllokim nga ana e strukturës së emergjencave qëndrore civile pasi drejtori ndodhej me pushime, duke shkaktuar në këtë mënyrë edhe një reagim nga kreu i KLSH Arben Shehu që bëri thirrje për rikthim në punë.
Pas rikthimit, ditën e djeshme ka nisur kontrolli edhe në këtë institucion. Po ashtu, KLSH do të auditojë dhe verifikojë në Ministrinë e Brendshme, ministrinë e Mbrojtjes si dhe pushtetin vendor, paisjet që janë në dispozicion për raste emergjencash si ajo që po përjeton aktualisht vendi.
