U tha se humbi jetën nga infeksioni në dhëmballë, dalin në dritë detaje tronditëse nga vdekja e 23-vjeçares në Tiranë

23-vjecarja Evgjeni Baxho,  humbi jetën pak ditë më parë në Tiranë, ku u tha se gjeti vdekjen nga një infeksion në dhëmballë.

Në dokumentin e Policisë Gjyqësore raportohen detaje tronditëse.

Gazetarja Anila Hoxha ka siguruar disa dokumenta në të cilat thuhet se në momentin që në banesë kanë shkuar grupi hetimor me ekspertin kriminalistik dhe mjekun ligjor në trupin e viktimës janë vënë re disa shkresa.

Bëhet me dije se në trup kishte disa shenja të bëra me lapostil me ngjyrë të kuqe. Shenjat i kishte në pjesën e barkut dhe në kurriz.

“Gjatë këqyrjes së vendit të ngjarjes është vënë re në trupin e kufomës, në pjesën e barkut një shkrim i panjohur, i bërë me lapostil me ngjyrë të kuqe nga kërthiza deri në pjesën e ezofagut. Po ashtu gjatë autopsisë në pjesën e shpinës së kufomës janë vërë re tre shkrime të tjera të panjohura, të bëra po ashtu me lapostil të kuq”, thuhet në dokument.

Policia ka sekuestruar telefonat dhe laptopin e të resë.

“Gjatë këqyrjes së banesës në cilësinë e provës materiale janë sekuestruar dy telefonat tip Samsung në pronësi të kufomës dhe një laptop i saj. Po ashtu janë sekuestruar një tampon steril me ngjyrë të kuqe si ajo e gjakut për të cilën është bërë vendimi biologjik. Gjithashtu janë sekuestruar në cilësinë e provës materiale një fletë format A4 i shkruar me stilolaps blu dhe disa fletë të tjera me simbole dhe figura të panjohura të shkruara me ngjyrë të kuqe dhe jeshile dhe objekte të tjera të ngjashme”, përmbyllet dokumenti i oficerit të Policisë Gjyqësore.