Zgjedhjet e 25 prillit/ Olsian Çela ultimatum prokurorive: Të hetohen shkeljet, duhet transparencë për publikun

Menjëherë pas zgjedhjeve të 25 prillit, rastet e krimeve zgjedhore që partitë politike denoncuan ishin të shumta.

Në lidhje me këtë temë ka reaguar sot dhe kryeprokurori Olsian Çela.

Me anë të një prononcimi për mediat, ai u ndal te krimet zgjedhore.

Numri një i organit të akuzës në vend u shpreh se ka inkurajuar të gjitha prokuroritë e rretheve gjyqësore në vend që të hetojnë rastet në transparencë të plotë dhe rezultatet t’i transmetohen publikut.

“Në lidhje me hetimin e krimeve zgjedhore është kërkuar nga prokuroritë të ketë përgjigj e të shpejta në drejtim të këtyre proceseve. E rëndësishme është që hetimet të shoqërohen në proces transparent, që publiku t jetë i qartë, e të ketë informacion të plotë në atë çka bërë Prokuroria. Duhet të jemi të besueshëm dhe integritetin e prokurorëve dhe prokurorisë.

Çështja e zgjedhjeve është çështje që prek shumë prokurori të rretheve gjyqësore e kanë impakt në të gjithë vendin, ndaj rezultati i çdo hetimi, është i rëndësishëm. Rëndësi ka që hetimet të jenë të plota, të kryhen në kohën e duhur e rezultatet t’i përcillen publikut. Ne jemi drejtuar disa herë prokurorive të rretheve gjyqësore, i është ofruar mbështetja për të kryer hetimet e plota dhe profesionale që lidhen me zgjedhjet”, u shpreh Çela.