“Presim informacione” Mesazhet fyese për qytetarët, Meta kërkesë kompanisë: U dërguan nga qendra juaj

Pas denoncimit se në emër të tij ishin dërguar mesazhe fyese dhe kërcënuese në drejtim të qytetarëve të ndryshem, presidenti Ilir Meta është në pritje të informacionit nga kompania telefonike.

Konkretisht, zëdhënësi i Kreut të Shtetit, Tedi Blushi bën me dije se sot Meta iu drejtua me një kërkesë për informacion kompanisë telefonike, pasi sipas të dhënave të siguruara mesazhet e manipuluara janë dërguar nga qendra e mesazheve të kësaj kompanie.

“Sot, Presidenti i Republikës Ilir Meta ju drejtua me një kërkesë për informacion kompanisë “One Telecommunications” lidhur me keqpërdorimin kriminal të mesazheve telefonike, gjoja sikur janë dërguar nga numri i Tij personal zyrtar, në adresë të disa qytetarëve.
Sipas të dhënave të siguruara, mesazhet e manipuluara, janë dërguar nga qendra e mesazheve të kësaj kompanie telefonike.
Për këtë arsye, Presidenti Meta është në pritje nga “One Telecommunications” të informacionit të nevojshëm, para nisjes së procedurave ligjore në sistemin ndërkombëtar”, deklaron Blushi.