Shkarkimi i Metës/ Mblidhen firmat, Konferenca e Kryetarëve miraton axhendën: Ja kur nis seanca e parë

Mazhoranca duket se është e vendosur deri në fund për të shkarkuar presidentin Ilir Meta nga detyra.

Për momentin janë mbledhur firmat e 47 deputetëve që kërkojnë këtë gjë.

Ditën e sotme Konferenca e Kryetarëve miratoi  programin e punës së Kuvendit për periudhën 10 maj-9 korrik 2021 dhe kalendarin e punimeve për periudhën 4-21 maj 2021, ku në axhendën e ditës së nesërme u planifikua dhe seanca e parë për shkarkimin e presidentit Meta.

Shumica socialiste e argumenton kërkesën “bazuar në disa shkelje të rënda të Kushtetutës sipas parashikimeve të Nenit 90, nga ana e Presidentit Ilir Meta përpara dhe gjatë fushatës zgjedhore”.

Neni 90 i Kushtetutës thekson se:

“Presidenti i Republikës mund të shkarkohet për shkelje të rëndë të Kushtetutës dhe për kryerjen  e një krimi të rëndë. Propozimi për shkarkimin e Presidentit në këto raste mund të bëhet nga jo më pak se një e katërta e anëtarëve të Kuvendit dhe duhet të mbështetet nga jo më pak se dy të tretat e të gjithë anëtarëve të tij. Vendimi i Kuvendit i dërgohet Gjykatës Kushtetuese, e cila, kur vërteton fajësinë e Presidentit të Republikës, deklaron shkarkimin e tij nga detyra.”