“Ndodhi për arsye personale” Ekzekutoi para banesës të riun, zbardhet dëshmia e Angjelin Sterkajt

Zbardhet dëshmia e Angjelin Sterkajt, personi që akuzohet se më 13 shkurt i mori jetën Armando Beqirit para banesës.

Ngjarja e rëndë ndodhi në Islandë.

Ndërkohë mësohet se Sterkaj, ka treguar para policisë se e kreu krimin për arsye personale dhe nuk ka preferuar të flasë më shumë.

Ai ka shtuar se vrasjen e ka bërë vetëm dhe nuk ka patur bashkëpunëtorë.

Sterkaj ka thënë madje se i vjen keq se disa janë në paraburgim, pasi s’kanë lidhje me ngjarjen.

“Më vjen shumë keq që një numër i madh njerëzish, të cilët nuk kanë marrë pjesë në atë që bëra unë, ishin të përfshirë në këtë çështje dhe madje u desh të vendoseshin në paraburgim. Gjithçka ka ndodhur për arsye personale, të cilat kishin të bënin personalisht me mua dhe të ndjerin. U bënë kërcënime serioze dhe filloi rrjedha e ngjarjeve, të cilat nuk i shpjego dot për momentin”, ka thënë ai.

Angjelin Stërkaj nuk është një emër i panjohur edhe për policinë shqiptare, pasi është shpallur në kërkim për vjedhje me dhunë.

Policia ka dyshime se e gjithë ngjarja ka ndodhur për prishje pazaresh të drogës, por ende nuk kanë prova.

Kujtojmë që pak para mesnatës së 13 shkurtit, Armando parkoi makinën e tij në garazh, dhe në të njëjtën kohë kur po ecte për tek dera e përparme, një makinë iu afruar shtëpisë së tij. Në atë moment ai u qëllua me disa plumba duke i shkaktuar vdekjen.