Ministrja Margariti denoncon: Dëmtim në rrjetin elektrik në Kalanë e Shkodrës

Ministrja e Kulturës, Elva Margariti ka reaguar për dëmtimin e rrjetit elektrik të ndriçimit në Kalanë e Shkodrës.

Ajo thotë se ky është një krim ndaj trashëgimisë kulturore, që është bërë nga individë të papërgjegjshëm dhe që qytetarët duhet të ndihmojnë në zbardhjen e ngjarjes.

“E shokuar nga lajmi i dëmtimit të rrjetit elektrik të ndriçimit të Kalasë së Rozafës, në Shkodër! Ende pa iu gëzuar kësaj kurore të Shkodrës, që kurrë nuk ishte dukur më e bukur, individë të papërgjegjshëm kanë kryer një krim, duke dëmtuar pasurinë tonë të përbashkët. Ftoj çdo shkodran të ndershëm që jo vetëm të distancohet, por edhe të ndihmojë institucionet e drejtësisë, për vënien e përgjegjësve përpara ligjit!”, thotë Margariti.