LIGJET E BIZNESIT
Ish-ministri i Mbrojtjes, Arben Imami ishte ndër firmëtarët, i cili kërkoi dorëheqjen e menjëhershme të Lulzim Bashës nga drejtimi i Partisë Demokratike, si pasojë e humbjes së zgjedhjeve. Në këtë kuadër, Imami ka lëshuar një akuzë të fortë ndaj kryetarit Basha.
Në studion e Top Talk të gazetarit Denis Dyrnjaja, ai tha se listat e kandidatëve për deputetë në PD janë blerë me para.
“U shkallmuan rregullat e PD, u prishën listat, u blenë me para. Paguhen para e këto zëra qarkullojnë haptazi me PD-në. Unë po them se janë paguar para dhe atëherë dhe tani. Nuk ndërtohet një parti në këtë mënyrë. Mos kërkoni ndonjë parti prokurori. Kjo është çështje opinioni brenda PD-së, le ta dalë Lulzim Basha ta hedhë poshtë. Kur ta mësoj do ta them konkretisht, pasi me të dëgjuar e kam. Kur nuk respektohet statuti, e bën një listë dhe i vë logo tjetër; Basha heq logon e PD-së, e i vë Shqipëria e re. Çfarë do të ndodhë? Nëse nuk reflekton do të vijmë prapë kur jemi këtu, do të ketë përsëri humbje zgjedhjesh edhe pas katër vitesh”, tha Imami.
Sipas Imamit, gjithçka erdhi pas nënshkrimit të paktit të vitit 2017, mes Bashës dhe Ramës, e cila nuk u bë transparente.
“Një vendi i emancipuar, një popull i qytetëruar, një klasë e media e qytetëruar nuk merret me rezultatin e zgjedhjeve, merret me faktin se si erdhëm deri këtu. Zgjedhjet nuk janë humbur tani më 25 prill, janë humbur në maj të vitit 2017, jo për marrëveshjen, por rezultatet që ajo solli. Zgjedhjet kanë dalë identikisht me të njëjtin rezultat si në 2017, PS dhe aleatët saj kanë 77 deputetë, ato kanë 63. Ka pasur një spostim të votave nga 2017 që i ikën te LSI, i janë kthyer mbrapsht PD. Kjo në fakt ka një shpresë ndoshta diçka mund të ndodhë krijojë një entuziazëm se pati një shpresë, por rezultati është identik humbja është njësoj si në 2017-ën”, tha Imami.
