Meta sfidon haptazi Ramën: Bëhu trim dhe hajde sot, merr po deshe dhe “të fortët”e tu 

Presidenti i Republikës Ilir Meta, ditën e sotme ka sfiduar haptazi kryeministrin e Shqipërisë Edi Rama në një përballje televizive, përballje kjo e cila kërkohet prej kohësh nga Meta dhe Basha, mirëpo Rama ka refuzuar.

Kreu i Shtetit është i ftuar mbrëmjen e sotme tek Syri.tv teksa i bën thirrje Kreut të Qeverisë që t’í bashkohet atij në përballjen televizive. Jo vetëm kaq, pasi sipas Metës, nëse kryeministri nuk dëshiron të shkojë tek gazetari Çim Peka, mundet që vetë presidenti të shkojë kudo që të jetë Rama.

“Po pres me padurim përgjigjen tënde o trimi i xha Jahos!”, shkruan Meta.

Shënimi i Ilir Metës

Një ftesë e sinqertë për Kapedanin e Bllokut!

Sot në ora 20:45, jam i ftuar për një intervistë live në Syri TV nga Çim Peka.

Të ftoj edhe ty të bëhesh trim dhe të vish sot në një përballje televizive para shqiptarëve.

Nëse ke siklet të vish vetëm merr kë të duash me vete, deputet nga partia ose hajde bashkë me të gjithë “të fortët” e tu.

Nëse ti nuk do debat televiziv tek Çimi, unë e le atë për ty dhe vij kudo që të jesh ti.

Vetëm të lutem më thuaj!

Bëhu njëherë trim, hë të keqen, se dita e Llogaridhënies erdhi.

Të lutem më thuaj!

Po pres me padurim përgjigjen tënde o trimi i xha Jahos!