LIGJET E BIZNESIT
Policia e Pukës ka raportuar se ka arrestuar dhe proceduar penalisht drejtuesin e një subjekti politik. Sipas uniformave blu, ai hartonte lista me të dhëna të kartave të identitetit dhe i premtonte qytetarëve para në këmbim të votës.
Menjëherë, ka reaguar dhe kryesia e LSI-së në Qarkun e Shkodrës. Nëpërmjet një deklarate ata shprehen se aktivistët e LSI janë në të drejtën e tyre për të bërë ushtrime zgjedhore, në vijim të praktikave dhe orientimeve të Komisionit Qendror të Zgjedhjeve për mënyrën e votimit.
Policia ka arrestuar shtetasin Vasil Shabani, pasi nga kontrolli i ushtruar në mjetin e tij tip Nisan u gjetën një shumë prej 528.000 Lekë (te rinj) si dhe një fletë e ngjashme me fletën e votimit.
Gjithashtu në vijim të veprimeve hetimore u procedua edhe në gjendje të lirë Kryetari provizor i Subjektit Politik LSI për Bashkinë Pukë, shtetasi Demir Syla.
Deklaratë e kryesisë së LSI Qarku Shkodër
Dega e LSI qarku Shkodër informon e sqaron opinionin publik se ngjarja e ndodhur ne Pukë, ku aktivistë të LSI janë marrë nën hetim nga policia është një situatë që tregon politizimin e tejskajshëm të policisë së Rilindjes.
Aktivistët tanë janë në të drejtën e tyre për të bërë ushtrime zgjedhore, në vijim edhe të praktikave dhe orientimeve të Komisionit Qendror të zgjedhjeve për mënyrën e votimit. Është skandaloze dhe e turpshme të dërgosh për ndjekje penale aktivistë politikë të cilët duan të bëjnë të njohur mënyrën e votimit, aq më shumë që është një skemë e re, e papërdorur më parë.
Fletët e gjetura janë demonstrative dhe nuk kanë si të jenë origjinale, kur ato akoma nuk janë prodhuar. Ato janë thjesht dhe vetëm orientuese dhe natyrshëm përdoren nga të gjithë subjektet politike.
I bëjmë thirrje policisë të ndalë këtë revansh të turpshëm dhe antiligjor, dhe të investohet e angazhohet në kryerjen e detyrave të veta funksionale.
